Конспект урока: «Синтаксисысь тӧдӧмлунъяс мӧдпӧвсталӧм да вынсьӧдӧм»

Повторение изученного по теме «Синтаксис. Пунктуация» в 5 классе
Скачать материал
Просмотр
содержимого документа

МОУ «СОШ» с. Большелуг

 

 

 

 

 

 

 

 

 

 

 

 

Коми кывйысь 5 –ӧд класслы урок конспект

 

Уроклӧн тема:

«Синтаксисысь тӧдӧмлунъяс мӧдпӧвсталӧм

да вынсьӧдӧм»

 

 

 

 

 

 

 

Урок конспектсӧ дасьтiс

Старцева Эльвира Александровна,

коми кыв да литература велöдысь

 

(Конспектыс дасьтöма Напалкова Галина Николаевна,

коми кыв да литература велӧдысь серти,

 

Шӧръягса  школа)

 

 

 

 

 

 

 

 

 

 

 

 

 

Ыджыдвидз

2019

Урок нуӧдан кадпас:

Ӧшым тӧлысь квайтöд лун.

Школа:   МОУ «СОШ» с. Большелуг.

Класс: 5.

Тема: «Синтаксис да пунктуация» тема  мӧдпӧвсталӧм да вынсьӧдӧм.

Могъяс:

  1. Челядьлысь чужан коми кыв дiнӧ муслун чужтӧм, мам кыв тӧдны-велӧдны кӧсйӧмсӧ сӧвмӧдӧм.
  2. Мӧдпӧвставны тӧдӧмлунъяс кыв тэчас, сюрӧса да содтана юкӧдъяс, прӧстӧй да сложнӧй сёрникузяяс, ӧтсяма юкӧдъяс да шыӧдчӧм, веськыд сёрни да ёрт-ёрта сёрни.
  3. Вынсьӧдны челядьлысь став кужӧмлунъяссӧ, медым найӧ петкӧдлiсны бур тӧдӧмлунъяс став тайӧ велӧдӧм темаясысь.
  4. Сӧвмӧдны литература сёрни.
  5. Воспитайтны бать-мам пыдди пуктӧм да верстьӧ йӧзлысь кывзысьӧм. Видзны вӧр-ва да сэнi олысьяссӧ.

 

Оборудование:

  1. Дӧска, мел.
  2. Витӧд класслы велӧдчан небӧг да гортса тетрадь.
  3. Г. Юшковлӧн мойдкывйысь юкӧн.
  4. Кывъя удж серти карточкаяс.

 

Урок сикас: комбинируйтӧм.

Урокын методъяс:

  1. Мытшӧда- туялана,

2. Репродуктивнӧй.

 

 

Урокын приёмъяс:

 

1.Кывъя (сёрни, велӧдысьлӧн кыв).

2. Практическӧй (упражняйтчӧм).

 

 

Уроклӧн план:

 

  1. Котыртан здук (оргмомент):        1 мин.
  2. Тема серти художествоа текст вылын уджалӧм:                          12 мин.
  3. Велӧдӧм материалысь тӧдӧмлунъяс ёнмӧдӧм, зумыдмӧдӧм: 16 мин.
  4. Кывкӧртӧдъяс вӧчӧм: 3 мин.
  5. Гортса удж сетӧм: 2 мин.
  6. Ӧценкаяс пуктöм да гӧгӧрвоӧдӧм: 2 мин.
    1. 3

 

Уроклӧн мунӧм:

 

Дӧскаын гижӧдъяс:

 

Ӧшым тӧлысь  квайтöд лун.

                                                 Классын удж.

Синтаксис да пунктуация.

 

 

 

  1. Котыртан здук (оргмомент):

- Видза оланныд, дона челядь! Пуксьӧй. Ме рад, мый ми бара тіянкöд аддзысим. Вайö нюммунам öта-мöдлы да заводитам талунъя урок. Ставныд-ӧ дасьӧсь урок кежлӧ?   Дасьöсь. Бур.

 

  1. Урокö пырöдчöм:

- Талун ми тіянкöд мöдöдчам  öтвылысь гöсьтитны, а кытчö мунам, аддзам дöска вылысь.

Вайö зіля ставныд петалöй  дöска дорö уджыштны. Аддзанныд, тані миян дзугсьöм шыпасъяс-лöсьöданныд кö найöс колана ног-пыр жö гöгöрвоанныд, кытчö ми тіянкöд мöдöдчам.

(Челядь петöны да дöска вылö кыдзсюрö тэчöм шыпасъясысь тэчöны кывъяс «Синтаксис да пунктуация».)

- Зэв бур! Сідзкö, талун ми тіянкöд мöдам гöсьтитны  «Синтаксис да пунктуация» ордö.

Восьтам тетрадьяс, гижам талунъя кадпас да урок тема.

 

Талунъя урок вылын ми тiянкӧд нöшта ёнджыка вынсьӧдам синтаксисысь став тӧдӧмлунсӧ да мӧдпӧвсталам велӧданторсӧ, медым мӧд урок вылын тi петкӧдлiнныд зумыд да бур тӧдӧмлунъяс контрольнӧй удж вылын.

 

 

  1. Тема серти художествоа текст вылын уджалӧм:

Тіян водзын Г.А. Юшковлöн «Тöла додь» небöг.

(Книгалöн медводдза лист бок вылысь ми аддзам Геннадий Юшковлысь сьöлöмöдз йижан кывъяс: Гажа небöг донаяслы, Коми муын быдмысьяслы)…

 

  1. И сідз, медводдза станцияыс миян «Кывтэчас».

Коді висьталас, мый сэтшöмыс кывтэчас? Кыдзи артмö кывтэчас?

(Вежöртас да грамматика боксянь йитчысь кык либö унджык кыв артмöдöны кывтэчас)

 

(Дöска дорын удж)

Видзöдлöй дöска вылö, сэтысь ті аддзанныд кыдзсюрö гижöм кывъяс. Видлöй лöсьöдны сетöм кывъяссьыс сёрникузяяс.

 

Öтнадлы улича шöрад гажтöм сулавнытö. (сулавнытö, шöрад, гажтöм, улича, öтнадлы)

Нинöм вöчигмоз Миша довгис вöрлань. (Миша, вöрлань, вöчигмоз, нинöм, довгис)

Миша пырис вöрö, кежис ёльлань. (пырис, кежис, Миша, вöрö, ёльлань)

Неылын сулаліс пöрысь коз. (сулаліс, пöрысь, коз, неылын)

 

(Челядь уджалöны ас кежысь, нöшта  отсасьöны öта-мöдлы)

 

Бур, молодечьяс.

А öні пуксям места вылö да уджыштам тетрадьын.

Асланым сёрникузяясысь корсялам кывтэчасъяс.

 

Тiян мог: корсьны кывтэчасъяс да гижны найӧс. Индыны сюрӧса да йитчысь  кывъяс. Но медводз гӧгӧрвоӧдам, кыдзи тӧдмалам кывтэчасысь сюрӧса кывсӧ.

(Сюрӧса  кывсянь зависитысь кыв дорӧ сувтӧдам юалӧм.)

 

- Видзӧдлам,  кодлӧн мый  артмис. Кутшӧм мытшӧдъяс паныдасисны тайӧ уджсӧ вӧчигӧн?

 

Молодечьяс.

 

Тайö нёль сёрникузяыс артмöдö неыджыд текст. Кыдзи чайтанныд, коді лоö шöр геройнас тайö гижöдас? (Миша)

 

Водзö ми мунам гöсьтитны  «Лыддьысян станцияö».

 

Челядь, а медым мичаа лыддьысьны, мый колö тöдны?

(Шуанног вежлалöмöн лыддьысьöм, логическöй ударение колана ног пуктöм).

 

- Тiянлы быдӧнлы пызан выланыд разӧдӧма  текст, кодӧс бара жö босьтöма Г.А. Юшков гижӧдысь. Вайӧ öтвылысь  тӧдмасямам  текстнас.

(Челядь лыддьöны сьöрсьöн-бöрöн)

 

 

Неылын сулалiс // пӧрысь коз. Öтар бокыс сылӧн // коркӧ керыштлӧмысь // сирӧссьӧма. Миша // матыстчис коз дорӧ, гыж йывнас // чуктӧдiс сиртор, сюйис вомас. Сирыс // уль на вӧлi, курыд, пиньӧ сибдан. Бӧр ковмис сьӧлыштны // вомсьыс.

  Дзикӧдз // Миша // уси сьӧлӧмнас. Пуксис коз бокӧ, доровтiс юрсӧ, лэдзис льӧбсӧ.

 - Миша! Миша! – шыасис друг // кодкӧ // коз пу йывсянь. Миша // сэтшӧма повзис! Вӧрзьыны оз вермы.

- Миша! Миша! Кывтӧм али мый?- бара кылiс, сӧмын öнi дзик дiнас.

Сы водзын сулалiс // пӧрысь-пӧрысь дед. Кузь тошкыс // вожалӧма.

Миша // зэв ӧдйӧ бӧр кунис синъяссӧ  да бергӧдчис // коз пулань.

- Эн пов, Миша, абу ӧд ме звер,- небыда шуис // дед.

- А-а, к-кодi н-нӧ тэ?- повзьӧмысла мӧмъялiг, юалiс // Миша.

- Ме // вӧрса дед. Некодлы // лёксӧ // ог вӧч. Бергӧдчы мелань.

- Тэ, дед, менӧ мыйӧн тӧдан?- юалiс Миша да ньӧжйӧник бергӧдчис дедлань.

- Ме ставсӧ тӧда, Миша. Весиг тӧда, мый тэнӧ талун // гортсьыд вӧтлiсны. Ачыд тэ // мыжа. Сьӧкыд // тэныд // лоӧ овнытӧ. Ок, сьӧкыд! Он кӧ кӧсйы вежсьыны, мекӧд мунам. Бурджык лоӧ.

 

 Г. Юшков.

 

- Кыдз ті чайтанныд, кутшӧм тайӧ гижӧд?

(Мойдкывйысь юкӧн.)

- Мыйла тi тадзи думайтанныд? Мый отсалiс тiянлы воӧдчыны татшӧм кывкӧртӧдӧдз?

(Кыськӧ локтiс волшебнӧй дед, кодi ставсӧ тӧдӧ Миша йылысь.)

- Зэв бур! А ӧнi сетам мойдкывыслы ним. Кыдзи эськӧ тi юрнималiнныд тайӧ мойдкывсӧ?

(«Миша да дед»)

 

- (Лыддьылісны кö) А мыйӧ велӧдӧ мойдыс?

(Кывзысьны бать-мамлысь, оз ков асныравны.)

- А тi кӧсъянныд лоны Миша кодьӧн?  (…)

- Мыйла? Мый тiянлы эз кажитчы Мишаын?   (…)

 

 

- А ӧнi видзӧдлам текстын сьöдöн тöдчöдöм  кывъяс вылас да нуöдам кывъя удж. Кыдзи тi гӧгӧрвоанныд тайӧ кывъяссӧ?

 

Уси сьӧлӧмнас- дзик шог лоис, жугыльмис;

Лэдзис льӧбсӧ- забеднӧ лоис, зумыштчис, синваыс кутiс доршасьны;

Тошкыс вожалӧма- пӧрысьысла юксьӧма кык пельӧ;

Мӧмъялiг юалiс- мыкталӧмӧн,  ёна повзьӧмысла;

Мыжа- винӧватöй.

 

- Зэв  бур! Уськӧдӧй нöшта ӧтчыд тӧд выланныд, кутшӧм темаяс ми тiянкӧд велӧдiм синтаксис юкӧнысь?

 

(Кыв, кывтэчас, сюрӧса да содтана юкӧдъяс, прӧстӧй да сложнӧй сёрникузяяс, ӧтсяма юкӧдъяс да шыӧдчӧм, веськыд сёрни да ёрт-ёрта сёрни.)

 

- Молодечьяс!

Сідзкö, ми воим «Сёрникузя» старцияö, миян мог:  пыдіджыка  видлавны сёрникузяяс.

 

Лыддям медводдза сёрникузясӧ да висьталам, кутшӧмӧн сiйӧ лоӧ.

(Прӧстӧй сёрникузя, паськӧдӧма.)

 

- Докажитӧй, мый сiйӧ прӧстӧй.

(Ӧти грамматика подув (öти подувпас да ӧти юӧрпас.)

 

- А ӧнi лыддям коймӧд сёрникузясӧ. А тайӧ сёрникузяыс кутшӧмӧн лоӧ?

(Эмӧсь ӧтсяма юкӧдъяс.)

 

- Корсьӧй да индӧй нöшта  ӧтсяма юкӧдъяса сёрникузяяс…

 

- Корсьӧй сёрникузясӧ, кодi заводитчӧ «- Миша! Миша!-» кывъясысь. Мыйсяма пасъяс танi пасйӧмаӧсь?  

(Торйӧдӧмаӧсь веськыд сёрни.)

 

- А мыйла горӧдан пас бӧрвылас пуктӧмаӧсь? Кыдз тi чайтанныд, позис-ӧ кутшӧмкӧ мӧд пас пуктыны?

 

- Корсьӧй сёрникузя, кодi заводитчӧ «Сэтшӧма повзис!» кывъяссянь. А мыйла танi горӧдан пассӧ пуктӧма?

(Ыджыд чувствоӧн шуӧм сёрникузяыс, а абу горӧдӧмӧн, кыдзи и воддза видлалан сёрникузяясыс, сьӧлӧмсянь петысь кывъяссӧ вайӧдӧма.)

 

- Зэв бур! А ӧнi корсьӧй текстсьыс шыӧдчана сёрникузяяс.

-  Кыдзи гижӧны шыӧдчана сёрникузяяссӧ? Мый отсӧгӧн торйӧдсьӧны шыӧдчӧмъясыс сёрникузяясас?

(Сёрникузяясын шыӧдӧчöмъясыс торйӧдсьӧны чутiкъясӧн кыкнан боксяньныс  либӧ горӧдан пасъясӧн.)

 

- А ӧнi индӧй вайӧдӧм мойдкывсьыс сложнӧй сёрникузяяс. Мыйӧн сложнӧй сёрникузяяс торъялӧны прӧстӧйясысь?

(Сложнӧй сёрникузяяс артмӧны  кык либӧ некымын грамматика подулысь.)

 

- А мый лоӧ сёрникузяын грамматика подувнас?

( Юӧрпас да подувпас.)

 

- Бур! Но,  мый, аддзинныд сложнӧй сёрникузяяссӧ текстсьыс? Мыйла найӧ лоӧны сложнӧйяссӧн? Эскӧдӧй вочакывнытö.

 

(«Весиг тӧда, мый тэнӧ талун гортсьыд вӧтлiсны».

Тӧда- 1 морт, ӧнiя кад; вӧтлiсны- 3 морт, колян кад.

«Он кӧ кӧсйы вежсьыны, мекӧд мунам».

Он кӧсйы вежсьыны- 2 морт, ӧтка лыд; мунам- 1 морт,  уна лыд.)

 

 

4. Велӧдӧм материалысь тӧдӧмлунъяс ёнмӧдӧм да зумыдмӧдӧм:

 

 

Мича вöрö воим, уна пасъяса. Кыдз найö öтув шусьöны? (Пунктуация пасъяс).

Да, ми тіянкöд нöшта öтчыд мöвпöсталам тані пунктуация пасъяс.

 

Пунктуация кывйыс артмöма латинскй кывйысь- пункция (укол). Пункт - точка. Зэв важöн  грекъяс  гижисны беддьöн - стилос. Гижигас кытчö сувтыштлöны вöлі,  сэні вöчлісны укол-мöд ногöн кö, пуктылісны точка. Восьтöй любöй книга-кымын сэні пунктуация пас. Ми сэтшöма сэтчö велалім, мый весигтö ог казялöй. Дерт, олöмыд мунö воддзö, миян лоöны выль пасъяс, велалім нин смайлик пасö, аслыссикас чужöмö, коді артмöма кык чутысь, чутікысь да öтка скобкаысь. Либö контакса ХЕСШТЭГö  #.

 

Тіян водзын мойдысь юкöн. Лыддя ме, ті следитöй.

 

Недыр мысти и  Вöрса дед воис.

-Но, аддзылін лёкъяссö?-юаліс сійö.

-Аддзылі,-  вочавидзис Миша.

-Вот и бур, -шуис дед.-Висьтав öні меным, кытчö кольччан: йöйяс дорö, дышъяс дорö, горшъяс дорö, дуркъяс дорö али лёкъяс дорö?

-Кольчча?-повзис Миша.-Ме некытчö ог кольччы. Ме бöр гортö муна.

-Гортад öд зіля велöдчыны ковмас, мамыдлы отсасьны, мыссьыны быд лун некымынысь, горшасьöмтö вунöдны, нöйтны некодöс оз позь!-лыддьöдліс дед.

-Мед! Мед!-шуис Миша.

 

.  -  чут

?  - юалан пас

! –  горöдан пас

  -  уна чута

,  - чутік

;  - чута чутіка

:  -  кыкчута

-  -  тире (визь)

( )  -  гöгрöс скобкаяс

« »  - кавычкаяс

 

Тіян мог: пуктавны колана пунктуация пасъяс.

 

5.Кывкӧртӧдъяс вӧчӧм:

 

- Вӧчам кывкӧртӧдъяс талунъя урок серти. Мый ми талун мӧдпӧвсталiм синтаксис юкӧнысь?

- Мый колис вежӧраныд?

- Кутшӧм мытшӧдъяс паныдасисны пунктуация пасъяс тэчигӧн?

- Вӧчам торъя кывкӧртӧдъяс синтаксисысь велӧдӧм торъя темаяс серти. Быдӧн вӧчӧ ӧти кывкӧртӧд.

(Быдӧнӧс торйӧн юавны.)

 

6. Гортса удж сетӧм:  

 

- Молодечьяс! А ӧнi гортса удж йылысь. Восьтам дневник да гижам гортса удж: 218 удж (119-120 л.б.). Гортын тайö удж серти дасьтысьöй изложение кежлö. Гижны тетрадьö оз ков. Изложение кутам гижны классын мöд урокö.

 

7. Ӧценкаяс юӧртӧм да гӧгӧрвоӧдöм:

 

- Талун ставныд бура уджалiнныд, унатор удитiм вӧчны öтвылысь, унатор мӧдпӧвсталiм.

 

Эг и казявлӧй ми кадсӧ,
Регыд триньӧбтас звӧнок.
Кужим мӧдпӧвъёвтны ставсӧ,
Бура коллялім урок.

 

  1. Рефлексия.

Кыдз помнитанныд, матыстчö челядьлöн ёна виччысяна тöвся гаж,  Выль во. Та вöсна  ассьыным кывкöртöдъяс вöчам  ёлка дорын.

 

Тіян пызан вылад эмöсь ёлка чачаяс, куим рöмаöсь.

Гöрд рöма чача  висьталö, мый «Синтаксис да пунктуация» тема тіянлы гöгöрвоана.

Лöз  рöм висьталö, мый кутшöмкö тема  колö мöдпöвставны на, абу на дзик ставыс гöгöрвоана.

А руд  рöм висьталö, мый гöгöрвотöмыс уна на, сідзкö,  водзö вылö ёна на колö ужавны  «Синтаксис да пунктуация» тема вылын.

Дасьöсь кö, öшöдöй  бöрйöм чачанытö.

Аттьӧ  быдöнлы урок вылын  уджалӧмысь! Аддзысьлытӧдз!

 

 

 

 

 

 

 

 

 

 

 

 

 

 

Информация о публикации
Загружено: 22 мая
Просмотров: 263
Скачиваний: 1
Старцева Эльвира Александровна
Русский язык и литература, 5 класс, Уроки